ភ្នំពេញៈ វីដេអូ ដែលមានរយៈជិតប្រាំមួយនាទីរបស់លោក លី សាម៉េត ថតឡាយចេញពីផ្ទះកូននៅ ខែត្រព្រះសី ហនុ បានទទួលស្គាល់ទោសកំហុសខ្លួន ភ្លាមៗនោះ សម្ដេចតេជោ ហ៊ុន សែន ប្រធានព្រឹទ្ធសភា ក៏បានចេញសារមួយបញ្ជាក់ទៅលោកគ្រូមាវិញនៅផេកផ្លូវការសម្ដេចនារសៀលថ្ងៃទី៤ ខែវិច្ឆិកា ឆ្នាំ២០២៤ ថា « ខ្ញុំសូមបញ្ជាក់ជូន ថា មិនមែនដោយសារតែវីដេអូសារភាពកំហុស និងសូមទោសមួយនេះ លី សាម៉េត ត្រូវបានរួចខ្លួននោះឡើយ។
ជំនួយការខ្ញុំម្នាក់ឈ្មោះ ដួង តារា ត្រូវបានឃាត់ខ្លួនរង់ចាំការកាត់ទោសដោយសារជាប់ពាក់ពាក់ព័ន្ធបោកជាមួយ លី សាម៉េតនេះ។ ពេលនេះ លី សាម៉េត ក្រោយពីរត់គេចខ្លួនបានបង្ហាញខ្លួន ហើយសូមសមត្ថកិច្ចដែលជា នគរ បាល ឬ កងរាជអាវុធហត្ថទៅនាំខ្លួន លី សាម៉េត បញ្ជូនទៅតុលាការដើម្បីកាត់ទោសតាមច្បាប់។
លី សាម៉េត បានសុំពេលព្យាបាលខ្លួននៅផ្ទះមុនពេលចូលខ្លួនឱ្យតុលាការកាត់ទោស។ មិនអាចធ្វើបែបនេះបានឡើយ នគរបាលយុត្តិធម៌ ត្រូវតែនាំខ្លួន លី សាម៉េត បញ្ជូនទៅតុលាការតាមនីតិវិធី។ ខ្ញុំសង្ឃឹមថា សមត្ថកិច្ចមិនបន្តឱ្យ លី សាម៉េត បានស្ថិតនៅក្រៅសំណាញ់ច្បាប់ទៀតទេ។
យោងតាមប្រភពសុំមិនបញ្ជេញឈ្មោះពី ខែត្រព្រះសីហនុ បានឱ្យដឹងថា លោក លី សាម៉េត ហៅ គ្រូមា ចេញមុខសារភាពហើយខណៈពេលនេះសមត្ថកិច្ចនគរបាល ខែត្រព្រះសីហនុ កំពុងនាំខ្លួនមកកាន់ រាជធានីភ្នំពេញ ដើម្បីចាត់ការបន្តតាមនីតិវិធី។
បើតាមការសង្គេតមើលវីដេអូដាក់ផ្សាយក្នុង ផេកផ្ទាល់ខ្លួន របស់លោក លី សាម៉េត ហៅ គ្រូមា បានលើកដៃសំពះយំគោកពេបមាត់ និងសក់បះឡើងលើ ដោយបាននិយាយទទួលស្គាល់ទោសកំហុសដើរបោកប្រាស់គេឯង ហើយបានយកឈ្មោះសម្ដេចតេជោ ហ៊ុន សែន ទៅប្រើដើម្បីទាញយកផលប្រយោជន៍បុគ្គល។ អ្វីដែលគួរឱ្យឈឺសើចនោះនៅពេលលោក លី សាម៉េត ហៅ គ្រូមា ហៅ តាកញ្ចក់ទិព្វ ចេញមុខសារភាពពីផ្ទះកូននៅ ក្រុងព្រះសីហនុ គាត់បាននិយាយទូរស័ព្ទទាំងទឹកមុខញញឹមស្រស់ដោយមានសមត្ថកិច្ចម្នាក់ពាក់ខោអាវស៊ីវិលអមជាមួយផង។
នៅក្នុងនេះដែរប្រជាពលរដ្ឋបានលើកឡើងបែបចំអកថា ថ្ងៃនេះមិនឃើញមានអ្នកជូតទឹកភ្នែកឱ្យ អ៊ំ ? ឬមួយ អ៊ំ យំគ្មានទឹកភ្នែក ? តើលុយបានមកពីលោក កន សុកាយ អតីតអភិបាល ស្រុកល្វាឯម ខែត្រកណ្ដាល ចំនួន ៣០ម៉ឺនដុល្លារនោះ អ៊ំ យកទៅណា ? អ៊ំ យកលុយនោះទៅធ្វើអ្វីខ្លះ ? តើ អ៊ំ យំនេះចេញពីក្នុងចិត្តដែរឬទេ ?
គួរបញ្ជាក់ថា ព្រះសម្មាសម្ពុទ្ធ ទ្រង់សំដែងថា « បុគ្គលណាសាបព្រោះនូវគ្រាប់ពូជយ៉ាងណា គឺរមែងទទួលបាននូវ ផលយ៉ាងនោះ »។ តាមច្បាប់ធម្មជាតិ « នៅលើលោកយើងនេះគ្មានអ្វីឋិតថេរទៀងទាត់ជាអមតនោះទេ » គឺមានតែអំពើល្អប៉ុណ្ណោះអាចធ្វើឱ្យមនុស្សស្រឡាញ់អាណិត និងចងចាំនៅក្នុងចិត្ត។ រឿងដើរបោកប្រាស់គេនេះត្រូវ បាន សម្ដេចតេជោ លាតត្រដាងឱ្យដឹងកាលពីអំឡុង ខែតុលា ឆ្នាំ២០២៤ ដែលលោក លី សាម៉េត បោកប្រាស់គេ ជាច្រើននាក់បាន លុយរាប់សែនដុល្លារ ទៅរាប់ លានដុល្លារអាម៉េរិក ឯណោះ៕
