ក្រុមអាជ្ញាធរឥណ្ឌាកាលពីថ្ងៃសុក្រទី២សីហាបានប្រាប់ក្រុមអ្នកទេសចរឱ្យចាកចេញពីតំបន់កាស្មៀរដោយសារមាន” ការគំរាមកំហែងភេរវកម្ម ” ខណៈដែលសេចក្តីរាយការណ៍នៃប្រព័ន្ធផ្សព្វផ្សាយបាននិយាយថាកម្លាំងយោធា ២៥.០០០ នាក់ត្រូវបានបញ្ជូនទៅតំបន់ភ្នំហេមពាន្តដែលកំពុងមានបញ្ហានេះ។
ការដាក់កងទ័ពបន្ថែមនិងវិធានការសន្តិសុខផ្សេងទៀតដោយរួមទាំងការអំពាវនាវឱ្យត្រៀមបម្រុងទុកស្បៀងនិងឥន្ធនៈនោះ បានធ្វើឱ្យមានភាពជ្រួលច្របល់និងភ័យខ្លាចនៅតំបន់ដែលមានជនអ៊ីស្លាមរស់នៅដ៏ច្រើននេះ ដែលត្រូវបានអះអាងសិទ្ធិកាន់កាប់ដោយប៉ាគីស្ថានផងដែរ។
រថយន្តជាច្រើនជាជួរៗ បានរង់ចាំចាក់ប្រេងតាមស្ថានីយប្រេងឥន្ធនៈ ខណៈពេលដែលពួកអ្នកស្រុកតម្រង់ជួរនៅតាមហាងលក់អាហារនិងនៅតាមកន្លែងម៉ាស៊ីនដកប្រាក់ធនាគារ។
រដ្ឋាភិបាលក្រុងចាមុយ-កាស្មៀររបស់ឥណ្ឌា( Jammu-Kashmir)បាននិយាយថាដោយសារមានព័ត៌មានសម្ងាត់នៃការគំរាមកំហែងភេរវកម្មប្រឆាំងការធ្វើធម្មយាត្រាហិណ្ឌូដ៏ធំនិង ដោយសារស្ថានភាពសន្តិសុខនៅពេលនេះ ពួកអ្នកធម្មយាត្រានិងអ្នកទេសចរគួរតែចាកចេញជាបន្ទាន់។
លោក Kanwal Jeet Singh Dhillon មេបញ្ជាកកងទ័ពឥណ្ឌានៅតំបន់កាស្មៀរ បាននិយាយថាកាំភ្លើងបាញ់ស៊ីបមួយដើមនិងគ្រាប់មីន មួយគ្រាប់ ដែលមានសញ្ញាសម្គាល់ប៉ាគីស្ថានត្រូវបានរកឃើញនៅលើផ្លូវនៃការធ្វើធម្មយាត្រា”Amarnath Yatra” ដែលទាក់ទាញក្រុមអ្នកកាន់សាសនាហិណ្ឌូរាប់រយពាន់នាក់ក្នុងមួយឆ្នាំៗ ៕
